Dünýäde ýarymgeçirijileri öndüriji iň uly kompaniýalaryň biri bolan Taiwan Semiconductor Manufacturing Company-nyň (TSMC) bazar bahasy Taýwanyň fond biržasynda ilkinji gezek 1 trln dollardan geçdi.
18-nji iýulda geçen söwdanyň jemi boýunça kompaniýanyň bazar bahasy 29,82 trln Taýwan dollaryna (takmynan, $1,013 trln), paýnamalaryň bahasy bolsa 1150 Taýwan dollaryna (takmynan, $39,1) ýetdi.
TSMC-niň üç aýda tas 50% ýokarlanan paýnamalarynyň ösüşi maýadarlaryň emeli aňyň ösýän we Nvidia hem Apple ýaly müşderilerden islegiň ýokarlanýan döwründe kompaniýanyň öz ornuny berkitjekdigine ynam bildirmegi bilen baglanyşyklydyr.
TSMC 1 trln dollardan durnukly geçen Aziýadan ilkinji kompaniýa boldy. Ozal PetroChina 2007-nji ýylda gysga wagtlyk bu derejä ýetipdi.
2025-nji ýylyň ikinji çärýeginde TSMC-niň girdejisi 39% ýokarlanyp, takmynan, 31,7 mlrd dollara ýetdi, arassa girdeji bolsa 61% ýokarlanyp, takmynan, 13,5 mlrd dollar boldy. Bu analitikleriň çaklamasyndan ýokarydyr. Kompaniýa ýyllyk girdejisiniň ösüş çaklamasyny 30%-e çenli ýokarlandyrdy.
Tehnologiýa ägirtlerini çip bilen üpjün edýän TSMC EA-a bolan gyzyklanmanyň artýan bazarynda öz ornuny güýçlendirýär. Kompaniýanyň üstünligi global tehnologiki ösüşde ýarymgeçirijileriň ähmiýetiniň ýokarydygyny görkezýär.
