Täze eplenýän Samsung Galaxy Z Fold7 we Flip7 smartfonlarynyň ekranlaryny çalyşmak örän çykdajyly bolup biler diýip, SamMobile portaly ýazýar.
Çeşmäniň maglumatlaryna görä, Galaxy Z Fold7 smartfonynyň çeýe içki ekranyny çalyşmak 761 ýewro, daşky ekrany bolsa 525 ýewro düşer. Galaxy Z Flip7 üçin içki eplenýän panel 342 ýewro, daşky FlexWindow displeýi bolsa 207 ýewro düşer. Görkezilen bahalar hyzmat merkezlerindäki işiň bahasyny öz içine almaýar.
Belläp geçsek, Ýewropada Galaxy Z Fold7-niň öz bahasy 2099 ýewro, Galaxy Z Flip7 bolsa – 1199 ýewro barabar.
Samsung-yň adaty kepilligi ekrana ýeten mehaniki zeper üçin çykdajyny ýapmaýar. Şonuň üçin köp ulanyjylar tötänleýin zeperlerden goraýan tölegli Samsung Care+ hyzmatyna ýazylýar. Galaxy Z Fold7 üçin ýazylyşyk aýda 13 dollara ýa-da ýylda 259 dollara barabar, ekranyň ýa-da yzky gapagyň bejergisi bolsa her gezek üçin 29 dollar. Galaxy Z Flip7 üçin ýazylyşyk aýda 10 dollar ýa-da ýylda 169 dollardyr.
Samsung-yň çeýe displeýleri berkligi bilen tapawutlanýar we ençeme ýyl işjeň ulanylyş üçin niýetlenendir. Şeýle-de bolsa, tötänleýin ýagdaýlarda smartfonlara zeper ýetip biler, şonuň üçin gajetleri seresaply ulanmak gerek.
