Marvel Studios-yň ýolbaşçysy Kewin Faýgi Demir adamyň roluny ýakyn wagtda başga bir aktýoryň ýerine ýetirip biljekdigini aýtdy. Bu barada Variety habar berýär.
2008-nji ýyldan bäri supergahryman Demir adama öwrülýän Toni Starkyň keşbini ekranda Robert Dauni-kiçi janlandyryp gelýärdi. Indi bolsa aktýoryň geljekki «Ar alyjylar» filminde zalym Doktor Dumuň rolunda işlejegi göz öňüne tutulyp, Demir adamyň ornuna başga aktýor saýlanar.
Faýginiň aýtmagyna görä, Kapitan Amerika (Stiw Rojers) we «X adamlary» oýnaýan aktýorlaryň hem çalşylmagy ähtimal. Marvel katalogyndaky beýleki iki meşhur gahryman – Dedpul bilen Rosomaha bolsa öňküligine galar: olaryň keşbi ýene-de Raýan Reýnolds bilen Hýu Jekmana tabşyrylar.
«Bu gahrymanlar bilen şowhuny hasam artdyryp bolar. Ýöne nirededigini indi göreris», – diýip, Faýgi belledi.
«Ar alyjylar: Kyýamat güni» filminiň 2026-njy ýylyň dekabr aýynda çykmagyna garaşylýar. Film häzirki wagtda Beýik Britaniýada surata düşürilýär.
