Billi Aýliş režissýor Jeýms Kemeron bilen täze taslamanyň üstünde işläp başlandygyny habar berdi. Aýdymçy bu barada Mançesterdäki dört konsertiniň biriniň dowamynda aýtdy diýip, Variety ýazýar.
Aýliş bu şäherdäki çykyşynyň surata düşüriş prosesiniň bir bölegi boljakdygyny belledi.
“Zalda kameralaryň örän köpdügine, ähtimal, üns beren bolsaňyz gerek. Men jikme-jik maglumatlary aýdyp bilmerin, ýöne Jeýms Kemeron bilen bilelikde 3D formatda üýtgeşik bir zat döredýändigimi tassyklap bilerin” – diýip, ol aýtdy.
Şeýle-de, aýdymçy režissýoryň konserte gatnaşan bolmagynyň mümkindigini we yzygider birnäçe gün özüniň sahna şol bir obrazda çykmaly boljakdygyny belledi. Taslama barada giňişleýin maglumat ýok, ýöne muşdaklar onuň dokumental film, klip ýa-da çeper lenta bolup biljekdigini çaklaýar.
Aýliş üçin bu kinoda ilkinji tejribe däl: 2021-nji ýylda “Billi Aýliş: Dünýä birneme bulaşyk” dokumental filmi we “Öňküden has bagtly: Los-Anjelese söýgi haty” konsert filmi çykdy.
Bildiriş aýdymçynyň üçünji studiýa albomynyň çykmagyna bagyşlanan dünýä boýunça Hit Me Hard and Soft konsert syýahatynyň çäklerinde yglan edildi. Ýewropadan soň aýdymçy Ýaponiýa gider, syýahaty bolsa noýabr aýynda San-Fransiskoda tamamlar.
