Lamin Ýamalyň 10-luk belgili köýnekçeleri “Barselonanyň” resmi dükanlarynyň taryhynda satuw rekordyny goýdy. Bu barada Culemania neşiri habar berýär.
Şu möwsümde resmi taýdan 10-njy belgini alan winger klub merçiniň taryhynda bir günde iň köp satylan harydyň awtory boldy. Çeşmäniň maglumatlaryna görä, Nike kompaniýasy 70 000 köýnekçeden ybarat ilkinji toplumy sargyt etdi – ol 170 ýurda ibermek üçin paýlandy. Ilkinji toplumdan garaşylýan girdeji, takmynan, 10 mln ýewro barabar. Ýakyn aýlarda klubuň resmi satuw dükanlarynda haryt ätiýaçlygynyň üstüni doldurmak üçin täze üpjünçiligi ýola goýmak meýilleşdirilýär.
Çaga köýnekçesiniň bahasy 114,99 ýewro, ulularyňky – 134,99 ýewro barabar. Şeýle-de, oýunçylar tarapyndan ulanylýan köýnekçä meňzeş eksklýuziw wersiýa hem elýeterli, onuň bahasy 184,99 ýewro. Esasy isleg ilkinji iki modeliň paýyna düşýär, ýöne premium wersiýa hem uly islegden peýdalanýar, ony, esasan, Aziýadan syýahatçylar satyn alýar.
Culemania-nyň maglumatlaryna görä, klubuň dükanlarynyň birinde iki günde 400-den gowrak köýnekçe satyldy. Işgärler harydyň çalt satylýandygyny, ýöne ätiýaçlykda köýnekçeleriň heniz bardygyny belleýär.
“Barselonanyň” merçandaýzingine jogap berýän BLM kompaniýasy eýýäm 2025/26 möwsüminde girdeji boýunça taryhy rekordyň goýuljakdygyny aýtdy.
