Warner Bros. studiýasy Mortal Kombat wideo oýunlary boýunça düşürilen filmiň dowamynyň ilkinji treýlerini hödürledi. Ol “Mortal Kombat 2” adyny aldy. Wideodan görnüşi ýaly, täze bölümiň merkezi gahrymany Jonni Keýj boldy. Onuň keşbini Karl Urban ýerine ýetirdi.
Sýužet boýunça, Keýj – Golliwudyň öňki aktýory söweş ýaryşyna çagyrylýar. Bu ýerde ol we Ýer şalygynyň beýleki söweşijileri öz planetasy üçin Daşky dünýä we onuň hökümdary Şao Kana garşy söweşmeli bolýar.
Filmiň wizual stili 2021-nji ýyldaky film bilen deňeşdirilende hakyky oýunlara has ýakyn boldy. Döredijiler franşizanyň ruhuny saklamagy we oýundaky ýaly sahnalaryň köp bolmagyny wada berýär.
Režissýor hökmünde ýene-de Saýmon Makkuoýd çykyş edýär. Öz keşplerine Lýuis Tan (Koul Ýang), Jessika Maknimi (Sonýa Bleýd), Mehkad Bruks (Jaks), Ludi Lin (Lýu Kan), Hiroýuki Sanada (Içýan), Tadanobu Asano (Reýden), Çin Han (Şang Szun), Maks Huan (Kung Lao), Jo Taslim (Nub Saýbot) gaýdyp geldi. Olara Adelin Rudolf (şa gyzy Kitana), Tati Gabriel (Jeýd), Martin Ford (Şao Kan), Deýmon Gerinman (Kuan Çi), Ana Thu Nguen (Sindel) hem goşuldy.
Şeýle-de, kinokompaniýa esasy gahrymanlar bilen filmiň posterlerini hödürledi.
Kinoteatrlarda filmiň premýerasy 2025-nji ýylyň 24-nji oktýabryna meýilleşdirilýär.
Mortal Kombat – bu 1992-nji ýylda Midway Games studiýasy tarapyndan döredilen (soňlugy bilen oýun üçin hukuk NetherRealm Studios-a geçdi) faýting žanryndaky oýunlar toplumydyr. Oýun özboluşly stili we öz döwri üçin täzeçil usullary bilen derrew meşhur boldy.
