“Möý adam” filminiň ýyldyzy Endrýu Garfild täze “Emeli” (Artificial) dramedisinde Sem Altmanyň keşbini ýerine ýetirer. Filme Luka Guadanino režissýorlyk eder diýip, Variety habar berýär.
OpenAI-iň egindeş esaslandyryjysy we baş ylmy işgäri Ilýa Suskeweriň keşbini Ýura Borisow oýnar.
Film OpenAI bilen bagly wakalar barada gürrüň berer. Sýužet ChatGPT-ni döreden kompaniýanyň ýolbaşçylygyndaky dawalara esaslanar. 2023-nji ýylyň noýabrynda müdirler geňeşi garaşylmadyk ýagdaýda Sem Altmany baş direktor wezipesinden aýyrdy. Munuň sebäbi doly açylyp görkezilmedi, ýöne KHBS onuň bilen ýolbaşçylygyň arasynda dartgynlylygyň bardygyny habar berdi. Birnäçe günden soň işgärleriň we maýadarlaryň talaby bilen Altman wezipesine gaýtadan bellendi.
Film üçin ssenarini Saýmon Riç ýazdy. Ol şu tomus Italiýada düşüriler. Filmiň çykjak senesi barada maglumat ýok.
Garfild üçin bu Guadanino bilen ikinji bilelikdäki taslamadyr: ýylyň ahyryna çenli ol režissýoryň “Awdan soň” trillerinde hem peýda bolar. Aktýor “Wyždanyna görä” harby dramasyndaky (2016) we “Tik-tak, bum!” mýuziklindäki (2021) baş keşpleri üçin iki gezek “Oskar” baýragyna dalaşgär görkezildi. Soňkusy üçin “Altyn globus” baýragyny aldy.
