Londondan günorta-günbatardaky obada XIX asyryň ahyrynda iňlis ýazyjysy we şahyry Redýard Kiplingiň ýaşan we işlän jaýy satuwa çykaryldy. Gozgalmaýan emlägiň bahasy 3,6 mln funt sterlinge (takmynan, $4,8 mln) barabar diýip, Mansion Global habar berýär.
Kipling, beýleki eserleri bilen bir hatarda, Maugli atly oglan hakda nusgawy “Jeňňel kitabynyň” awtory hökmünde tanalýar. 1907-nji ýylda ol edebiýat boýunça Nobel baýragyny alan ilkinji iňlis boldy.
“Arundel-haus” jaýy Tisberi obasynda ýerleşýär. Ýazyjy 1894-nji ýylda, golaýdaky “Geýbls” jaýynda ene-atasy ýaşan wagty bu ýerde birnäçe aý boldy. Şol jaý hem satuwa çykarylyp, 2021-nji ýylda satyldy.
Jaýyň fasady daş bilen örtülen bolup, narpyz-ýaşyl reňkdäki giriş gapylary ýarym aýlaw görnüşli aýna bilen bezeldi. Birinji gatda kaminli esasy myhman otagy we aşhana hem nahar iýilýän otag bilen birleşdirilen ikinji myhman otagy ýerleşýär. Onda tutuş diwary tutýan we yzky howla bakýan penjireler oturdyldy. Aşhanada ýörite sargyt esasynda taýýarlanan şkaflar we mermer stol tagtasy bar.
Ýokarky gatda wanna otagly we baglyga bakýan esasy ýatylýan otag, myhmanhana lýuksy we iki goşmaça ýatylýan otag bar.
Jaýyň çäginde çagyl howly, ideg edilen otluk, baglyk, telär we pizza üçin peç bar. Şeýle-de, açyk howada dynç almak üçin goşmaça zolaklar göz öňünde tutulan.
