Samsung kompaniýasy dakylýan akylly gurluşlarynyň hataryny diňe bir sagatlar we ýüzükler bilen çäklendirmek islemeýär. Günorta Koreýanyň tehnologiýa ägirdi bu hatara täze gurluşlary – äýnekleri, gulakhalkalary we monjuklary hem goşar diýip, Samsung-yň mobil bölümçesiniň operasion müdiri Won-jun Çoýa salgylanyp, CNN habar berýär.
“Biz gajet ýanyňda götermez ýaly bolmaly diýip hasaplaýarys. Şonuň üçin bu äýnek, gulakhalka, sagat, ýüzük we geljekde, ähtimal, monjuk bolup biler” – diýip, CNN Çoýuň sözlerini getirýär.
Şeýlelikde, kompaniýa ulanyjylara smartfonsyz sanly gurşaw bilen aragatnaşyk saklamaga mümkinçilik berýän tehnologiýalaryň işlenip taýýarlanmagyny tassyklaýar. Bu heniz ýylyň başynda yglan edilen strategiýanyň dowamy boldy. Şol wagt Samsung Google bilen bilelikde akylly äýnegiň üstünde işleýändigini aýtdy.
Maý aýynda Korea Economic Daily koreý neşiri Samsung-yň AR äýnekleri üçin mikrodispleý döredýändigini habar berdi.
Geçen ýyl bolsa kompaniýa fitnes-trekinge gönükdirilen ilkinji akylly ýüzügini hödürledi.
Täze gurluşlaryň çykjak wagty barada maglumat ýok. Ýöne ýolbaşçylygyň sözlerine we KHBS habarlaryna görä, Samsung innowasion çözgütleriň hasabyna dakylýan gurluşlaryň bazaryndaky ornuny çynlakaý berkitmek isleýär.
