Microsoft korporasiýasy Windows 11 operasion ulgamyna täze EA kömekçisini goşdy. Ol gönüden-göni “Sazlamalar” programmasyna gurnaldy. Onuň wezipesi ulanyjylara zerur parametrleri tapmaga we meseläni adaty dilde beýan etmek arkaly ulgamy sazlamaga kömek etmekden ybarat.
Copilot wirtual kömekçisinden tapawutlylykda, täze agent aýratyn serwis däldir. Ol hut sazlamalar bölümine goşulan bolup, bu ýerde onlaýn ýagdaýda ulanyjy soraglaryna jogap hökmünde çözgütleri hödürleýär. Mysal üçin, “Sesiň kömegi bilen kompýuteri nädip dolandyrmaly?” diýen soraga EA agenti degişli funksiýany işletmelidigini düşündirer.
Işläp düzüjiler agentiň ýönekeý bir at boýunça gözlemän, hut soragyň düýp manysyna düşünýändigini belleýär. Bu ulanyjy zerur parametriň takyk adyny bilmedik ýagdaýynda aýratyn peýdalydyr. EA näsazlyklary düzetmekde we ulgamy indiwidual sazlamakda doly derejeli kömekçi bolar diýlip pikir edilýär.
Funksiýa Windows Insider programmasyna gatnaşýan Copilot+ PC kompýuterlerinde elýeterli. Ony ulanmak üçin “Sazlamalar” programmasynda gözleg setirinde sorag girizip başlamak ýeterlik.
Microsoft EA agentiň häzirlikçe gowşak işleýändigini, çünki ulanylýan dil modelleriň kämilleşmegini dowam etdirýändigini belleýär. Ozal kompaniýa şeýle funksiýany Copilot-a girizmek mümkinçiligini gözden geçirdi, ýöne ahyrynda bu pikirden ýüz öwürdi.
