Disney studiýasynyň “Lilo we Stiç” remeýki ýedi hepdäniň dowamynda 994,2 mln dollar ýygnady. Häzirki dinamikany göz öňünde tutsaň, “Lilo we Stiç” Hytaýyň “Neçža 2” animasiýasyndan soň, 1 mlrd dollardan geçjek ilkinji film bolup biler diýip, The Wrap neşiri habar berýär.
Ýedinji uikendde filmiň amerikan prokatynda kassa ýygymy 414,5 mln dollara ýetdi. Muňa garamazdan, ýerli prokatda ol henizem “Minecraft kinoda” filminden yza galýar – 423,9 mln dollar. Umumy global girdeji boýunça Disney öňde. 2025-nji ýylda diňe bu iki golliwud filmi 900 mln dollardan geçdi.
Film üçin esasy daşary ýurt bazarlary Meksika (66,5 mln dollar), Beýik Britaniýa (48,3 mln dollar), Fransiýa (40,6 mln dollar), Braziliýa (36,5 mln dollar), Germaniýa (31 mln dollar), Ispaniýa (26,5 mln dollar) we Hytaý (25,2 mln dollar) boldy.
2002-nji ýylyň adybir multfilmine esaslanan film gawaýili gyz Lilo (ony Maýýa Kealoha oýnady) bilen başga planetaly jandar Stiçiň dostlugy barada gürrüň berýär. Režissýor hökmünde Din Fleýşer Kemp çykyş etdi.
Filme Sidni Agudong, Kris Sanders, Zak Galifianakis, Billi Magnussen we Kortni B.Wens gatnaşdy. Premýera 22-nji maýda boldy.
