2025-nji ýylyň Klublaýyn dünýä çempionaty ýaryşynyň jemi boýunça aýry-aýry nominasiýalarda ýeňijiler yglan edildi. Ýaryşyň iň gowy oýunçysy “Çelsiniň” angliýaly ýarymgoragçysy Koul Palmer boldy. Ol alty oýna gatnaşyp, üç gol we iki assist bilen tapawutlandy. Finalda ol öz hasabyna iki gol we bir assist ýazdy.
Onuň klubdaşy, derwezeban Robert Sançes ýaryşyň iň gowy derwezebany diýlip ykrar edildi. Ol alty oýna gatnaşyp, olarda bäş goly geçirtdi. Üç oýun, şol sanda ýarym final we final gol geçirtmesiz tamamlandy.
Ýaryşyň iň gowy ýaş oýunçysy “Pari Sen-Žermeniň” ýarymgoragçysy Dezire Due boldy. 21 ýaşly futbolçynyň hasabynda ýedi oýunda bir gol we bir assist bar.
Ýaryşyň iň gowy bombardiri üçin baýragy Madridiň “Realynyň” hüjümçisi Gonsalo Garsiýa aldy. Ol alty oýunda dört gol geçirip, bir netijeli geçirim etdi.
Ýaryşyň finalynda “Çelsi” “PSŽ-ni” 3:0 hasabynda ynamly utdy. Oýun ABŞ-daky “Metlaýf-stedium” stadionynda geçdi. Duşuşygyň hormatly myhmany ABŞ-nyň Prezidenti Donald Tramp boldy. Ol futbolçylary sylaglamak dabarasyna gatnaşdy.
“Çelsi” ýaryşyň täzelenen görnüşinde titulyň ilkinji eýesi boldy. Ozal klub 2021-nji ýylda ýaryşda ýeňiş gazandy. Geçen möwsümde londonlylar Konferensiýalar ligasynda hem ýeňiji boldy.
