Hytaý kazyýeti ýerli bazarda Jeep awtomobillerini öndürmek üçin döredilen GAC Fiat Chrysler Automobiles (GAC FCA) kompaniýasyny batdy diýip yglan etdi. Stellantis konserni bilen hytaý GAC-yň bilelikdäki kärhanasy 2009-njy ýylda esaslandyrylypdy. Indi ol öz işini gutarnykly bes etdi.
Dolandyryjylaryň maglumatlaryna görä, munuň sebäbi kärhanany üýtgedip gurmagyň we mundan beýläk işi dowam etdirmegiň mümkin bolmazlygy boldy. Kazyýete 1,4 mlrd ýuanlyk 600 töweregi şikaýat arzasy berildi, ýöne auditden soň talap mukdary azaldyldy. Batmagyň yglan edilmegi bilen, aktiwleri paýlamagyň meýilnamasy tassyklandy. Kärhana “düşünendikleri we goldawlary üçin” karz berijilere minnetdarlyk bildirdi.
2022-nji ýylda GAC bilen hyzmatdaşlyk tamamlanandan soň, Stellantis Hytaýda Jeep önümçiligini bes edip, olary ýurda daşary ýurtlardan getirip başlady.
Kärhananyň ýapylmagy daşary ýurt brendlerine islegiň peselmegi we hytaý bazarynda milli awtoöndürijileriň ornunyň güýçlenmegi sebäpli bolup geçdi.
