Hytaýyň BYD kompaniýasy öz ulaglarynyň eýelerine God's Eye ulgamynyň işiniň netijesinde ýetip biljek islendik zyýanyň öwezini dolmaga taýýardygyny aýtdy. Bu ulgam eýýäm milliondan gowrak elektromobilde gurnalan bolup, ulaglary awtomatik taýdan awtoduralga ýerleşdirýär. Bu prosesiň dowamynda haýsydyr bir heläkçilik ýüze çyksa ýa-da ulaga zeper ýetse, onuň eýesine ätiýaçlandyryşy resmileşdirmek gerek däl – ähli çykdajylary kompaniýanyň özi ýapar diýip, Notebookcheck ýazýar.
BYD dünýäde ilkinji bolup dördünji derejeli awtonom ýerleşiş ulgamynyň howpsuzlygyna resmi tassyknama aldy – bu ulagyň sürüji gatnaşmazdan özbaşdak awtoduralga ýerleşip biljekdigini aňladýar. Bu aralykda awtomobile ýa-da beýleki ulag serişdelerine zeper ýeten halatynda ulag eýesine BYD-yň hyzmat gullugyna ýüz tutmak ýeterlik. Bu prosesi ýeňilleşdirip, ätiýaçlandyryş nyrhlarynyň ýokarlanmagyndan gaçmaga mümkinçilik berýär.
Kompaniýa awtomobiliň özbaşdak duralga ýerleşýän ýagdaýlarynda ulanyjylaryň howpsuzlygyna doly jogap berýändigini belledi. 8000 dollara ýa-da aýda 99 dollara ýazylyşyk bilen FSD awtopilotyny hödürleýän Tesla-dan tapawutlylykda, BYD öz ulgamyny mugt hödürleýär. Şeýle çemeleşme maglumatlaryň ýygnalmagyny we tehnologiýanyň kämilleşdirilmegini çaltlaşdyrýar.
BYD-yň pudakda awtonom dolandyryş ulgamyny işläp düzüjileriň iň uly topary bar. Ýakyn wagtda kompaniýa ýollarda hereket etmek üçin dördünji derejeli awtonom dolandyryşy goşjak täzelenmäni çykarmagy meýilleşdirýär.
