Meşhur britaniýaly şef-aşpez, restorator, teleýaýlym alyp baryjysy, öýde nahar taýýarlamagy we sagdyn iýmitlenmegi wagyz ediji Jeými Oliwer täze dünýä rekordyny goýdy. Ol taryhda iň köp gatnaşyjyly aşpezlik sapagyny geçirdi. Bu sapaga alty yklymdaky 42 ýurtdan jemi 10 515 adam gatnaşdy. Sapaklar Beýik Britaniýadaky 500-den gowrak mekdepde, şeýle-de dünýäniň dürli künjeklerindäki okuw otaglarynda, konferensiýa zallarynda hem-de açyk meýdançalaryň patiolarynda geçirildi.
Oliweriň topary tarapyndan gurnalan çäre çagalaryň arasynda öýde nahar bişirmegi we sagdyn iýmitlenmegi giňden wagyz etmegi maksat edinýärdi. Gatnaşyjylar sapak üçin ýörite döredilen platformada öňünden hasaba alnypdy. Şef-aşpez bu işiň aňsatdygyny we gyzyklydygyny görkezmegi maksat edinipdi.
Sapagyň dowamynda gatnaşyjylar gaýnatmak zerurlygy bolmadyk pomidor sously makaron taýýarladylar. Sapagyň azyndan 30 minut dowam etmegine garaşylýardy, ýöne ol hakykatda, bir sagat töweregi dowam etdi. Sapagyň ahyrynda ähli gatnaşyjylar taýýarlan naharlaryny dadyp gördüler.
Sapagy şef-aşpez Jeými Kşiştof Sumik geçirdi. Jeými Oliwer hem çärä gatnaşdy we soňra bu sapakdan hem-de öz toparynyň begençli pursatlaryndan wideo ýazgyny Instagram-daky sahypasynda (@jamieoliver) paýlaşdy.
«Başardyk! Ginnesiň dünýä rekordyny goýanymyza diýseň buýsanýan. Bu ýagdaý bilelikde nahar bişirmegi öwrenmegiň hözirini görüp, näderejede uly täsir döredip bilýändigimizi ýene bir gezek subut etdi. Sapaga gatnaşanlar bolmasady, muny başaryp bilmezdik – şonsoň hemmäňize sagbolsun aýdýan we berekella bize!» — diýip, Oliwer ýazdy.
Öňki rekord 2015-nji ýylda Polşada «Partnership for Health» guramasy tarapyndan goýlupdy, oňa 6778 adam gatnaşypdy.
