Twitter bilen Bluesky-yň esaslandyryjylaryndan biri bolan Jek Dorsi internet baglanyşygy bolmasa-da işleýän merkezleşdirilmedik Bitchat atly täze messenjeriň beta wersiýasyny hödürledi. Goşundy hatlary enjamlaryň arasynda geçirmek üçin Bluetooth Mesh tehnologiýasyndan peýdalanýar.
Resminamalarda aýdylmagyna görä, Bitchat global toruň näsazlyklaryna durnukly, wagtlaýyn we şifrlenen baglanyşyklary hödürleýär. Goşundyny ulanmak üçin registrasiýa etmek, hasap döretmek, e-poçta ýa-da telefon belgisi gerek däl. Hatlar diňe ulanyjynyň öz enjamynda saklanýar we «end-to-end encryption» usuly bilen şifrlenýär.
Bitchat gurnalan her bir enjam şol bir wagtda hem müşderiniň (client), hem-de serweriň wezipesini ýerine ýetirýär. Hatlar zynjyr döredip, enjamdan enjama geçýär. Ýagny, daş-töwereginde Bitchat ulanýan başga enjamlar bar bolsa, hatlar has hem uzak aralyga ýetip bilýär.
Dorsiniň sözlerine görä, Bluetooth Mesh Chat IRC-ä meňzeýär we 1990-njy ýyllaryň ilkinji onlaýn aragatnaşyk görnüşlerini ýada salýar. Ol şeýle hem geljekde goşundynyň uly göwrümli hatlary geçirmek üçin Wi-Fi arkaly hem işläp biljekdigini aýtdy.
Häzirki wagtda Bitchat diňe iPhone üçin beta görnüşde elýeterli. Goşundynyň doly wersiýasynyň ähli esasy platformalar üçin çykarylmagy meýilleşdirilýär.
