Samsung-yň Galaxy Watch 8 akylly sagatlary Google-yň Gemini emeli aňy bilen işleýän ilkinji Wear OS dolandyryşly enjamlar bolar. Bu barada Android Headlines neşiri internetde peýda bolan degişli mahabat suratlaryna salgylanyp habar berýär.
Insider Roland Kwandtyň berýän maglumatyna görä, Galaxy Watch 8 Classic modeliniň ekranynda “Ask Google Gemini” (Google Gemini-den sora) funksiýasy görkezilýär.
Samsung bu sagatlaryň üç görnüşini eýýäm şu gün, 9-njy iýulda geçiriljek Unpacked çäresinde hödürlemegi meýilleşdirýär. Şol ýerde Wear OS ulgamyna Gemini emeli aňynyň resmi taýdan goşulmagynyň yglan edilmegine garaşylýar.
Samsung adaty boýunça Google-yň geýilýän enjamlara niýetlenen operasion ulgamlarynyň ilkinji ulanyjysy bolýar. Mundan ozal hem ilkinji bolup Wear OS 4, Wear OS 5 we Google Assistant ýaly hyzmatlary alypdy.
Kompaniýadan bu maglumat boýunça entek resmi tassyklama ýok. Şeýle-de bolsa, täze mümkinçilikleriň peýda bolmagy köplenç yglan edilenden birnäçe aý soň amala aşyrylýar – öňki tejribeler muňa şaýat.
