Indoneziýanyň Flores adasynda Lewotobi Laki Laki wulkanynyň güýçli atylmasy bolup geçdi. Asmana 18 km beýiklikdäki kül sütüni göterildi diýip, ýerli häkimiýetlere salgylanyp, CNA habar berýär.
Indoneziýanyň wulkanologiýa agentliginiň maglumatlaryna görä, wulkan gaty sesli partlamalar bilen atyldy. Wulkanologlar güýçli ygal bolan ýagdaýynda wulkanyň etegindäki ilat nokatlarynyň üstüni basyp biljek palçyk akymlary barada duýdurdy.
Wulkanyň işjeňligi sebäpli Jetstar, Virgin Australia we AirAsia Indonesia ýaly birnäçe awiakompaniýalaryň gatnawlary ýatyryldy.
Bu Lewotobi Laki Lakiniň 2025-nji ýylda ilkinji atylyşy däl. Iýun aýynda kül sütüni 11 km ýetdi, bulutlar 150 km uzaklykdan görünýärdi we Taliburo obasyny örtdi. Şonda häkimiýetler howplulygyň iň ýokary derejesini yglan edip, syýahatçylary wulkana golaýlaşmazlyga çagyrdy. Şeýle ýagdaý maý aýynda hem boldy. 2024-nji ýylyň noýabr aýynda dowamly atylmalar dokuz adamyň ölümine getirdi, ýene onlarça adam şikes aldy, müňlerçesi ewakuasiýa edildi, awiagatnawlar bolsa wagtlaýyn togtadyldy.
Indoneziýa Ýuwaş umman otly halkasynda – wulkan we seýsmiki işjeňligiň ýokary bolan ýerinde ýaşaýar. Bu ýerde 120-den gowrak işjeň wulkan bolup, ýurt yzygiderli atylmalar we ýertitremeler bilen ýüzbe-ýüz bolýar.
