ABŞ-nyň Prezidenti Donald Tramp daşary ýurtlardan getirilýän harytlara salynýan gümrük paçlarynyň wagtlaýyn togtadylmagyny 2025-nji ýylyň 1-nji awgustyna çenli uzaltdy. Bu barada Ak tamyň resmi web sahypasynda habar berilýär.
Ilkibaşda käbir ýurtlar üçin aýratyn gümrük paçlaryny 9-njy iýuldan güýje girizmek meýilleşdirilipdi. Emma Prezident Tramp söwda şertnamalary bilen baglanyşykly gepleşikleriň tamamlanmagy üçin, goşmaça wagt bermek kararyna geldi. Ak tamyň beýannamasynda aýdylmagyna görä, bu karar ýokary derejeli resmileriň, şol sanda ABŞ-nyň söwda hyzmatdaşlary bilen alnyp barylýan gepleşikleriň ýagdaýy boýunça olaryň beren maslahatlarynyň esasynda kabul edilipdir.
Ak tamyň beýanatynda Prezidentiň birnäçe ýurda 1-nji awgustdan başlap, täze özara gümrük paçlarynyň güýje girjekdigi barada hat iberendigi aýdylýar.
1-nji awgustdan başlap, ABŞ Ýaponiýadan we Günorta Koreýadan getirilýän ähli harytlara, ABŞ-da öndürilen önümlerden başga, umumylykda, 25 göterimlik gümrük pajyny girizmegi meýilleşdirýär. Tokionyň ýa-da Seulyň garşylyklaýyn çäre gören halatynda, ABŞ-nyň bu paçlary has-da artdyrmak hukugynyň saklanýandygy bellenip geçilýär.
Donald Tramp şu ýylyň aprelinde 185 ýurtdan getirilýän harytlara salynýan gümrük paçlarynyň düýpli ýokarlandyryljakdygyny resmi taýdan yglan edipdi. Ilkinji tapgyrda 5-nji aprelden başlap umumy 10 göterimlik paçlaryň, soň bolsa 9-njy aprelden aýratyn paçlaryň güýje girmegi meýilleşdirilipdi. Ýöne soňra bu çäreler 90 gün möhlet bilen yza süýşürildi.
Häzirki wagta çenli ABŞ diňe üç ýurt – Wýetnam, Hytaý we Beýik Britaniýa bilen söwda şertnamalaryna gol çekdi. Waşington birnäçe möhüm hyzmatdaş, şol sanda Ýewropa Bileleşigi we Hindistan bilen söwda şertnamalary boýunça işjeň gepleşikleri dowam etdirýär.
