McLaren direktorlar geňeşiniň täze düzümini mälim etdi. Bu geňeş kompaniýanyň strategik dolandyrylyşyny alyp barar. Täze geňeşiň düzümine dokuz adam girýär, olaryň arasynda Ferrari-niň öňki ýolbaşçysy Luka di Montezemolo bilen Roll-Royce-a 15 ýyl ýolbaşçylyk eden Torsten Mýuller-Otwos hem bar.
Direktorlar geňeşine Abu-Dabiden CYVN Holdings maýa goýum kompaniýasy bilen baglaşylan ylalaşykdan soň, aprelde döredilen McLaren Group Holdings Limited ýolbaşçylyk eder. CYVN Holdings kompaniýasy McLaren Automotive-iň gözegçilik paýnamalaryny, McLaren Racing-iň bolsa käbir paýnamalaryny satyn alyp, olary Forseven atly britan startapy bilen birleşdirdi. Bu ylalaşyk McLaren Automotive-iň ähli maliýe borçlaryny üzmäge mümkinçilik berdi.
Täze direktorlar geňeşi diňe McLaren Automotive-niň ösüşine gönükdiriler, tutuş McLaren toparyna täsir etmez. Resmi beýanatda aýdylmagyna görä, ýokary derejeli awtoulag pudagynda uly tejribesi bolan hünärmenleriň geňeşe çekilmegi McLaren-iň kaşaň superkarlaryň önümçiligi boýunça dünýädäki öňdebaryjy ornuny berkitmek maksady bilen baglanyşyklydyr.
Luka di Montezemolo Ferrari-de uly özgertmeleri durmuşa geçiripdi. Torsten Mýuller-Otwos bolsa Rolls-Royce-a ýolbaşçylyk eden döwründe, brendiň satuwlaryny alty esse artdyryp, ýaş auditoriýany özüne çekdi hem-de kompaniýanyň ilkinji krossoweriniň çykmagyna mümkinçilik döretdi.
