Arheologlar Britaniýanyň demirgazygyndaky Nortumberlend graflygynda ýerleşýän Magna rim galasyndaky gazuw-agtaryş işlerinden soň özboluşly tapyndy barada habar berdi. Rimliler tarapyndan zibil ýeri hökmünde ulanylan gorag garymynda 32 jübüt deri aýakgaby tapyldy. Bu barada “Windolanda” haýyr-sahawat gaznasy habar berdi.
Umumy toplumdan sekiz jübüt ylmy gözlegçilerde aýratyn gyzyklanma döretdi. Olaryň dabanynyň uzynlygy azyndan 30 santimetrdi (biziň ölçeglerimiz boýunça – takmynan, 46-47-nji ölçeg), iň uly jübüt bolsa 32,6 santimetre ýetýär – bu 50-nji ölçegden hem uludyr.
Bu şeýle ululykdaky aýakgaplaryň ilkinji gezek tapylmagy däl. Soňky 55 ýylda goňşy Windolanda rim galasynda arheologlar 5 müň jübüt rim aýakgabyny tapdy, olaryň arasynda adatdan daşary ululykdaky 4-5 jübüt hem bardy.
Arheolog Reýçel Freýmiň aýtmagyna görä, bu babatda birnäçe pikir bar: ýa-da bu sebitde, hakykatdanam, örän uzyn adamlar ýaşapdyr, ýa-da aýakgap bu ýere gelen göwresi uly bolan adamlara degişli bolupdyr.
Alymlara häzirlikçe bu aýakgaby kimiň geýendigi we onuň haçan taýýarlanandygy mälim däl. Deslapky maglumat boýunça, olaryň ýaşy iki müň ýyla barabar. Has takyk senäni şol bir toprak gatlaklarynda tapylan keramikanyň seljermesi arkaly kesgitlemek başardar.
Freým Magnada we Windolandada aýakgaplaryň örän gowy ýagdaýda saklanmagynyň toprakda kislorodyň az bolmagy bilen baglanyşyklydygyny belledi.
