Dünýäniň iň baý adamy, Tesla we SpaceX kompaniýalarynyň ýolbaşçysy Ilon Mask “Amerika” ady bilen täze syýasy partiýany döredendigini aýtdy. Bu barada ol 5-nji iýulda ulanyjylaryň arasynda geçirilen ses berişligiň jemi boýunça X sosial ulgamynda habar berdi.
ABŞ-nyň Garaşsyzlyk güni Mask öz akkauntyna ýazylan adamlardan olaryň iki partiýaly syýasy ulgamdan garaşsyz bolmak isleýändigini ýa-da ýokdugyny sorady. Pikir soraşma gatnaşanlaryň üçden iki bölegi (65,4%) razylyk bilen jogap berdi, 34,6%-i garşy çykdy.
“2-ä 1 gatnaşygy bilen siz täze syýasy partiýany islediňiz we siz ony alarsyňyz… Şu gün size erkinligiňizi gaýdyp bermek üçin, “Amerika” partiýasy döredildi” – diýip, işewür şenbe güni agşam ýazdy.
Maskyň aýtmagyna görä, iki partiýalyk ulgamdan garaşsyz bolmak üçin Senatda 2-3 orna we Wekiller palatasynda 8-10 okruga ünsi gönükdirmek ýeterlik. Bu kanunlaryň kabul edilmegine täsir etmäge, aýratynam, partiýalaryň arasyndaky deňagramlylyk gowşak bolanda aýgytly sesi üpjün etmäge we kanunlaryň halkyň islegine laýyk gelmegini kepillendirmäge mümkinçilik berer.
Mask ozal Kongres ABŞ-nyň Prezidenti Donald Tramp tarapyndan “Uly ajaýyp kanun” (The Big Beautiful Bill) diýlip atlandyrylan salgyt ýeňillikleri baradaky kanuny kabul eden ýagdaýynda partiýa döredip biljekdigini aýtdy. ABŞ-nyň Senaty bir ses artykmaçlygy (51:50) bilen bu kanun taslamasyny kabul etdi – aýgytly ses wise-prezident Jeý Di Wensiň sesi boldy. Kongres 3-nji iýulda kongresmenleriň iň az zerur sanynyň – Wekiller palatasynyň 218 agzasynyň goldawyny alyp, kanuny tassyklady. 214 kongresmen – ähli demokratlar we iki respublikan garşy çykdy. Tramp bu kanuna 4-nji iýulda gol çekdi.
