Apple kompaniýasy Watch Ultra 3 smart-sagadyny 2025-nji ýylyň güýzünde çykarmaga taýynlyk görýär. Bloomberg agentliginiň žurnalisti Mark Gurmanyň habaryna görä, täze model hemra aragatnaşygyny we 5G torlaryny goldar.
Hemra aragatnaşyk arkaly tekst habarlaryny Wi-Fi ýa-da öýjükli torlara birikmezden ugradyp bolar, munuň üçin iPhone-yň hem zerurlygy bolmaz. Bu aýratynlyk diňe LTE-ni goldaýan modellerden esasy tapawutlaryň biri bolar.
Çeşmäniň maglumatlaryna görä, enjam täze S10 çibi ýa-da has döwrebap prosessor bilen üpjün ediler. Şeýle hem tiz zarýad bermek mümkinçiligi we täzelenen OLED displeý göz öňünde tutulýar. Täze displeý has ýagty bolar, giň burçdan görkezmegi üpjün eder we «Hemişe açyk displeý» (Always-on display) ýagdaýyndaky täzelenme ýygylygy ýokarlandyrylar. Şeýle aýratynlyklar eýýämden Apple Watch Series 10-da bar.
Apple Watch Ultra 2-de esasy üýtgeşme diňe goýy çal titan reňkli täze korpus bolupdy. Emma üçünji nesil model 2023-nji ýyldan bäri ilkinji möhüm enjam taýdan täzelenme bolup biler.
Şeýle-de bolsa, meýilleşdirilen ähli aýratynlyklaryň sagadyň çykjak wagtyna taýyn edilip ýetişilmezligem mümkin. Mark Gurman mart aýynda ganyň basyşyny ölçeýän funksiýanyň ornaşdyrylmagynda kynçylyklaryň bardygyny aýdypdy. Sagadyň çykjak wagtyna çenli Apple-yň bu mümkinçiligi taýyn edip ýetişip-ýetişmejekdigi häzirem näbelli.
MacRumors portalynyň habaryna görä, Apple Watch Ultra 3-üň tanyşdyrylyşy iki aýdan hem az wagtyň dowamynda bolup biler.
