iOS 26 operasion ulgamynda eger-de ulanyjy aýdym ýa-da islendik bir mazmun diňleýän wagty uklap galsa, AirPods we Beats nauşniklerini awtomatiki usulda öçürýän funksiýa peýda bolar. Bu mümkinçilik ýatmazdan öň aýdym, audiokitap ýa-da podkast diňleýänler üçin peýdalydyr.
Funksiýa «Pause Media When Falling Asleep» (Uka gidilende mediany duruzmak) diýlip atlandyrylýar. Ulanyjy diňleýän mazmunyna üns bermegini bes eden badyna, ses togtadylýar we nauşnikler öçürilýär. Munuň netijesinde batareýanyň güýji tygşytlanýar we audiokitabyň ýa-da podkastyň haýsy ýerinde galandygy ýatda saklanylýar.
Apple ulgamyň ulanyjynyň uka gidendigini nädip kesgitleýändigini anyklaşdyrmady.
Täze mümkinçilik barada Apple ilkinji gezek WWDC 2025 konferensiýasynda mälim etdi. Şonda gürrüň diňe AirPods barada gidýärdi. Ýöne MacRumors portalynyň awtorlarynyň biriniň anyklamagyna görä, bu funksiýa käbir Beats modellerinde hem işleýär.
iOS 26 täzelenmesi gurnalan badyna bu opsiýa deslapky ýagdaýda işjeň bolar. Eger-de enjam bilen nauşnikler birikdirilen bolsa, ony iPhone sazlamalaryndan dolandyrmak mümkin bolar. Häzirki wagtda iOS 26 diňe işläp düzüjiler üçin elýeterli. Köpçülige niýetlenen beta wersiýasynyň ýakyn wagtda çykarylmagyna garaşylýar, doly wersiýasy bolsa sentýabrda paýlanar.
