4-nji iýulda “Ýura eýýamynyň dünýäsi: Galkynyş” (Мир Юрского периода: Возрождение) filminiň global premýerasy boldy. Ol dinozawrlaryň janlanmagy baradaky meşhur seriýanyň täze bölümidir. ABŞ-da film 2-nji iýulda çykdy, häzir bolsa dünýädäki kinoteatrlarda elýeterli.
“Galkynyş” franşizanyň täze wersiýasynyň dördünji bölümidir. Waka “Agalyk” filminiň finalyndan bäş ýyl soň bolup geçýär. Sýužet boýunça, alymlar we harby işgärler topary täze güýçli derman döretmek üçin DNT-lerini öwrenmek maksady bilen iň uly dinozawrlaryň gözlegine ugraýar.
Baş keşpleri Skarlett Ýohansson (“Ar alyjylar”), Manuel Rulfo (“Linkoln aklawçy”), Jonatan Beýli (“Ferrari”) we Luna Bleýz (“Manifest”) ýerine ýetirdi. Režissýor “Nägehanlar” (2010), “Godzilla” (2014) we “Dörediji” (2023) filmleri bilen tanalýan Garet Edwards boldy.
The Hollywood Reporter neşiriniň maglumatlaryna görä, filmiň býujeti, takmynan, 180 mln dollar boldy. Gaýtadan başlanan franşizanyň 2018-nji ýylda çykan ikinji bölümi hem şonça mukdara düşüpdi. Şol bir wagtyň özünde, Universal Pictures studiýasy çykdajylary azaltmaga synanyşdy, ýöne marketingi hem hasaba alanyňda, umumy çykdajylar, insaýderleriň hasaby boýunça, 330-400 mln dollara ýetip biler.
Seriýanyň öňki filmleri dünýä prokatynda 1 mlrd dollardan gowrak ýygnady. Ähtimal, kompaniýa “Galkynyşdan” hem şeýle üstünlige bil baglaýan bolsa gerek.
