2025-nji ýylyň Klublaýyn dünýä çempionatynyň ilkinji ýarym finalçylary belli boldy. Finala çykmak üçin Angliýanyň “Çelsisi” bilen Braziliýanyň “Fluminense” topary oýnar.
Dörtden bir finalda “Fluminense” Saud Arabystanynyň çempionatynyň ýeňijisini – Er-Riýaddan “Al-Hilýaly” utdy. Duşuşyk Orlandodaky “Kemping Uorld” stadionynda geçirildi we braziliýaly toparyň peýdasyna 2:1 hasabynda tamamlandy.
40-njy minutda “Fluminenseniň” ýarymgoragçysy Mateus Martinelli hasaby açdy. Ikinji ýarymyň başynda, 51-nji minutda “Al-Hilýalyň” hüjümçisi Markos Leonardo hasaby deňledi. Braziliýa toparynyň ýeňiş goluny 70-nji minutda ýarymgoragçy Erkules geçirdi.
“Çelsi” çärýek finalda Braziliýanyň “Palmeýras” klubuny utdy. Oýun Filadelfiýada geçirildi we londonlylaryň peýdasyna 2:1 hasabynda tamamlandy.
16-njy minutda “Çelsiniň” ýarymgoragçysy Koul Palmer hasaby açdy. 53-nji minutda “Palmeýrasyň” hüjümçisi Estewao hasaby deňledi. Iňlis klubuna ýeňşi 83-nji minutda “Palmeýrasyň” argentinaly goragçysy Agustin Hiaýyň awtogoly getirdi.
“Çelsi” bilen “Fluminenseniň” arasyndaky ýarym final oýny 8-nji iýulda Ist-Raterfordda geçiriler.
