Bentley ganatly nyşany bolan Winged B-niň täze görnüşini resmi taýdan hödürledi. Bu logotipiň soňky 20 ýylyň dowamyndaky ilkinji täzelenmesi bolup, brendiň 106 ýyllyk taryhyndaky bäşinji täzelenmesidir. Täze logotip ilkinji gezek 8-nji iýulda tanyşdyryljak konsept awtoulagda peýda bolar.
Täzelenen nyşanyň üstünde kompaniýanyň täze baş dizaýneri Robin Peýjiň ýolbaşçylygyndaky topar işledi. Ganatlar has ýiti we dinamiki görnüşde döredildi, nyşanyň merkezindäki B harpy bolsa, egrilen gyralary we relýef görnüşi bilen has göwrümli edildi. Ol ýokary hilli sagatlaryň dizaýnyna meňzedilipdir. B harpyň aşagyndaky pes ganatlar aýryldy, şeýlelikde, nyşan «ýönekeý we döwrebap» görnüşe getirildi.
Konsept awtoulagyň tanyşdyrylmagy bilen bilelikde, Bentley-iň Kru şäherindäki (Angliýa) täze dizaýn studiýasy hem açylar. Bu studiýa 1938-nji ýyldan galan binanyň içinde ýerleşýär. Kompaniýanyň bellemegine görä, täze konsept awtoulag brendiň taryhyndaky meşhur modelleriň ýörelgesini dowam etdirer, şeýle-de geljekki dizaýnyň ugruny hem görkezer.
Robin Peýj täze nyşanyň Bentley-iň sanly döwürde ýönekeýlige we takyklyga ymtylmasyny alamatlandyrýandygyny aýtdy. Onuň sözlerine görä, bu üýtgeşme brendiň taryhyndaky täze we dinamiki döwrüň başlangyjydyr.
Bentley Motors 1919-njy ýylda Beýik Britaniýada inžener Uolter Ouen Bentli tarapyndan esaslandyryldy. Kompaniýa tiz wagtda kuwwatly we kaşaň awtoulaglary öndürýän öndüriji hökmünde abraý gazandy. 1998-nji ýyldan bäri, brend Volkswagen Group konsernine degişli.
