Çehiýada şu gün günortan töweregi giň gerimli tok öçmesi boldy diýip, «Novinky.cz» neşiri habar berýär.
Tok öçmesi Praga şäheriniň köp bölegine, şeýle-de bäş sebite, şol sanda Mlada-Boleslawa, Usti-nad-Labeme we Grades-Kralowä hem täsir etdi.
Paýtagtda metro we otly gatnawy tutuş togtady, şeýle-de tramwaý bilen trolleýbus hatarlarynyň aglabasy hem işlemedi. Soňra otly gatnawlary täzeden dikeldildi. Ýangyn söndürijiler liftlerde galan adamlary halas etmek üçin öýlere çagyryldy. Hassahanalar ätiýaçlyk tok çeşmesine geçdiler. Bankomatlar işini bes etdi.
Şeýle-de bolsa, Praganyň howa menzilleri işini adaty ýagdaýda dowam etdirdi.
Deslapky maglumatlara görä, näsazlyk energoulgamdaky tehniki säwlik bilen baglanyşykly. Elektrik energiýasyny tutuş ýurt boýunça paýlaýan «ČEPS» kompaniýasynyň ýokary woltly geçirijiler ulgamynda näsazlyk ýüze çykypdyr. Häzir hadysanyň takyk sebäpleri anyklanýar.
Polisiýanyň bellemegine görä, häzirki wagtda bu wakanyň arkasynda kiberhüjümiň ýa-da terrorçylykly howpuň bardygy barada hiç hili delil ýok. Şonuň bilen birlikde, hukuk goraýjy edaralar patrul gözegçiligini güýçlendirdiler.
Ýatlatsak, maý aýynyň başlarynda Ispaniýanyň we Portugaliýanyň energoulgamynda ýüze çykan generasiýa bilen bagly kynçylyklar sebäpli, bu ýurtlaryň uly bölegi elektrik energiýasyz galypdy. Käbir sebitlerde elektrik üpjünçiligini dikeltmek bäş sagada çekipdi.
