Dyson kompaniýasy ýylyň ähli paslynda ýertudana ösdürip ýetişdirmäge mümkinçilik berýän innowasion enjamyny tanyşdyrdy. Täze enjam Angliýanyň gündogar bölegindäki Linkolnşir graflygynyň golaýyndaky aýna ýyladyşhana oturdyldy diýip, Interesting Engineering neşiri ýazýar.
Işlenip düzülen enjam içine ýertudana ýerleşdirilen gaplardan ybarat aýlanýan tigir görnüşlidir. Bu gurluş ösümlikler üçin birmeňzeş yşyklandyryşy we howa çalşygyny üpjün edýär.
Mikroklimatyň ähli görkezijileri – temperatura, çyglylyk, CO₂ derejesi we suw mukdary awtomatiki usulda dolandyrylýar. Suwarmak üçin ýygnalan ýagyş suwy ulanylýar. Drenaž ulgamy kökleriň aşa suwarylmagynyň öňüni alýar.
26 akr (105 müň m2) meýdany bolan ýyladyşhana bir milliondan gowrak nahal ýerleşdirmäge ukyply. Hasyllylyk ýylda 1250 tonna ýetýär.
Hasyly ýygnamak üçin kameralar we manipulýatorlar bilen enjamlaşdyrylan robotlar ulanylýar. Olar ýetişen miweleri ösümliklere zyýan ýetirmezden seresaplylyk bilen ýygnaýar. Ultramelewşe çyralar miweleri kömelekli kesellerden goraýar.
Zyýan berijilere garşy göreşmek üçin himiki serişdeler ulanylmaýar. Olara derek ýörite peýdaly mör-möjekler ulanylýar, olar kiçi mehanizmler arkaly ýataklaryň arasynda deň derejede paýlanýar.
Ýyladyşhana öz bioenergetika toplumy bilen işleýär. Oba hojalyk galyndylary ýylylyga we elektrik energiýasyna öwrülýär. Bu prosesiň dowamynda bölünip çykýan kömürturşy gaz ösümlikleriň ösüşini çaltlandyrmak üçin ýyladyşhananyň içine gaýtadan goýberilýär, galan galyndylar bolsa dökün hökmünde peýdalanylýar.
Işläp düzüjileriň sözlerine görä, bu ulgam dürli howa şertlerinde, şol sanda gysga möwsümli ýa-da hasyllylygy pes toprakly ýerlerde hem işleýär. Bu enjamy beýleki ekinlerde-de synap görmek mümkin. Mundan başga-da, bu enjam ekologiýa ýetirilýän zyýany iň pes derejä getirmäge kömek edýär.
Dyson şeýle görnüşli enjamlary şäherleriň içinde – dükanlaryň ýa-da öňki senagat zolaklarynyň golaýynda ornaşdyrmagy teklip edýär. Bu ulag çykdajylaryny azaltmaga hem-de önümleriň täzeligini saklamaga mümkinçilik berer.
