Geçen hepde «Lion» futbol kluby maliýe kynçylyklary sebäpli, Fransiýanyň 1-nji Ligasyndan ikinji diwiziona düşürildi. L'Équipe gazetiniň maglumatlaryna görä, klubuň bergisi 175 mln ýewro barabar.
Klubuň düşürilmegi baradaky karary Milli administratiw gözegçilik departamenti (DNCG) kabul etdi. Klub degişli karara garşy çykyp, ýokary ligada galmak ugrunda göreşmegi meýilleşdirýär.
Bu ýagdaýlaryň çäginde klubuň ýolbaşçylygynda üýtgeşmeler boldy. Jon Tekstor «Lionda» 2023-nji ýylyň maý aýyndan bäri eýeleýän prezident wezipesinden çekildi. Onuň Eagle Football Holdings kompaniýasy klubuň paýnamalarynyň 75%-den gowragyna eýeçilik edýär.
Täze prezident hökmünde Mişel Kang bellendi. Ol 2023-nji ýyldan bäri «Lion» klubunyň direktorlar geňeşiniň agzasy, indi bolsa Eagle Football Group kompaniýasynyň baş menejeri wezipesini ýerine ýetirýär.
Geçen möwsümde «Lion» Fransiýanyň çempionatynda altynjy orny eýeläp, Ýewropa ligasynda çykyş etmäge hukuk gazanypdy. Klub ýurduň ýedi gezek çempiony bolup, ähli titullaryny 2002-2008-nji ýyllar aralygynda gazandy.
