Huawei kompaniýasy täze Pura 80 smartfon hataryny 10-njy iýulda dünýä bazaryna hödürlär. Dünýä boýunça tanyşdyrylyş dabarasy Dubaýda geçiriler. Bu barada kompaniýanyň resmi beýannamasyna salgylanyp, Gizmochina portaly habar berdi.
Bu hatara Pura 80, Pura 80 Pro, Pura 80 Pro+ we Pura 80 Ultra modelleri girýär. Olar ozal Hytaýda tanyşdyrylypdy. Häzirki wagtda bu modelleriň ilki bilen haýsy ýurtlarda satuwa çykjakdygy barada maglumat ýok.
Huawei Pura 80 Ultra flagman modeli dünýäde ilkinji gezek iki obýektiwli telefotokamera bilen enjamlaşdyrylan smartfon boldy. Bu enjam 50 megapiksellik üýtgeýän diafragmaly (f/1.6-4) kamera, 40 megapiksellik giň burçly kamera, 1,5 megapiksellik spektral datçik we goşa teleobýektiwli telefotokamera ulgamyndan (50 MP we 12,5 MP) ybarat bolup, 3,7 esse we 9,4 esse optiki zumy (ýakynlaşdyrma) üpjün edýär.
Pura 80 Pro modeli hem 50 megapiksellik esasy kamera we 40 megapiksellik giň burçly kamera bilen enjamlaşdyrylandyr. Bu modeldäki teleobýektiw 4 esse optiki zumy goldaýar.
Hataryň ähli modelleri Kirin 8020 çipseti esasynda işleýär. Enjamlar simli we simsiz tiz zarýad bermegi, şeýle-de hemra arkaly aragatnaşygy goldaýar. Esasy model 6,6 dýuýmlyk OLED displeý, beýleki modeller bolsa 6,8 dýuýmlyk LTPO ekran bilen enjamlaşdyrylandyr. Bu displeýler 1-den 120 Gertse çenli üýtgeýän täzeleniş ýygylygyny we 1,07 trln reňki görkezmegi başarýar.
Adaty model 5600 mA·sag sygymly batareýa bilen üpjün edilen (66 Wt simli + 50 Wt simsiz), ýokary modeller bolsa 5700 mA·sag batareýa bilen gelýär (100 Wt simli + 80 Wt simsiz).
