“Maklareniň” britaniýaly sürüjisi Lando Norris “Formula-1” çempionatynyň 11-nji tapgyry bolan Awstriýanyň Gran-prisinde ýeňiji boldy. Ýaryş Şpilbergde geçirildi.
Ikinji orny onuň topardaşy awstraliýaly Oskar Piastri eýeledi (2,695 sekunt yza galdy). Üçünji bolup pellehana “Ferrariden” Şarl Lekler geldi (+19,820).
Şeýle-de, ilkinji onluga girdi: 4. Lýuis Hemilton (+29,020, “Ferrari”), 5. Jorj Rassell (+62,396, “Mersedes”), 6. Liam Louson (+67,754, “Reýsing Bulls”), 7. Fernando Alonso (+1 aýlaw, “Aston Martin”), 8. Gabriel Bortoleto (+1 aýlaw, “Kik Zauber”), 9. Niko Hýulkenberg (+1 aýlaw, “Kik Zauber”), 10. Esteban Okon (+1 aýlaw, “Haas”).
Ýaryş “Uilýamsyň” ispaniýaly sürüjisi Karlos Saýnsyň ulagynda ýüze çykan meseleler sebäpli 15 minut giç başlady. Gyzdyryjy aýlawda ol hereket gutusyndaky näsazlyk sebäpli herekete başlap bilmedi, ulaga marşallar kömek etmeli boldy. Saýns aýlawy tamamlap, pit-leýne gaýdyp gelenden soň, onuň tormoz diskleri ot aldy. Mehanikler ody söndürdi we ulagy garaža saldy. Netijede, Saýns ýaryşa gatnaşyp bilmedi.
Ýaryşyň dowamynda “Red Bulluň” niderlandly sürüjisi Maks Werstappen bilen “Mersedesden” Kimi Antonelli çaknyşdy. Antonelli öňe geçmäge synanyşanda onuň tigirleri aýlanmagyny bes etdi, şondan soň ol Werstappeniň ulagyny kakdy. Ulaglaryň ikisine-de zeper ýetdi, şol sebäpli sürüjiler ýaryşy dowam etdirip bilmedi.
Indiki tapgyr – Beýik Britaniýanyň Gran-prisi 4 – 6-njy iýulda Silwerstounda geçiriler.
