Samsung täze simsiz nauşnigini - Galaxy Buds Core-y hödürledi. Bu model kompaniýanyň işjeň goh-galmagaly basyp ýatyrýan (ANC) iň arzan nauşnigi bolup durýar. Täze nauşnik Galaxy Buds FE-den has arzan bolsa-da, onuň esasy aýratynlyklaryny saklaýar, şeýle-de ýokary hilli audiokodekleri goldaýar.
Galaxy Buds Core daşky görnüşi boýunça hem Buds FE-ni ýada salýar. Ol USB Type-C porty bolan we simsiz zarýad bermegi goldaýan zarýad gutusy bilen bilelikde gelýär.
Nauşnik Bluetooth 5.4 bilen enjamlaşdyrylan we AAC bilen Samsung Seamless Codec (SSC) ýaly ýokary hilli audiokodekleri goldaýar. Öndürijiniň ýazmagyna görä, ol sesli jaňlarda ýokary hili üpjün edýär. Şeýle hem Galaxy AI bilen bilelikde häzirki wagtda terjime funksiýasy hem bar. Bu funksiýa ekrana degmezden, ýagny fon tertibinde işleýär, ýöne diňe Galaxy AI bolan smartfonlarda, mysal üçin, Galaxy S22, Z Fold4 we Flip4 modellerinden başlap ulanyp bolýar.
Her bir nauşnikde 65 mA·sag sygymly akkumulýator bar, zarýad gutusynda bolsa 500 mA·sag sygymly batareýa ýerleşdirilen. Işjeň goh-galmagaly basyp ýatyrmak funksiýasy öçürilen ýagdaýynda nauşnikler 35 sagada çenli, açyk ýagdaýynda bolsa 20 sagada çenli işleýär. Bir nauşnigiň agramy 5,3 gram, gutusy bilen bilelikde hemmesi – 31,2 gram. Enjam IP54 ülňüsine görä tozana we suwa garşy gorag bilen üpjün edilen.
Galaxy Buds Core gara we ak reňklerde elýeterlidir. Hindistanda bahasy 4999 rupiýadan (takmynan, 58 dollar) satuwyna başlandy. Beýleki ýurtlarda haçan we näçeden satuwa çykaryljakdygy barada häzirlikçe maglumat ýok.
