Fransiýanyň “Monako” futbol kluby 32 ýaşly ýarymgoragçy Pol Pogba bilen şertnama baglaşandygyny resmi web sahypasynda habar berdi. Şertnama 2027-nji ýylyň 30-njy iýunyna çenli niýetlenendir.
Pogba futbol karýerasyna Parižiň “Ruassi-an-Bri” we “Torsi” atly höwesjeňler klublarynda başlady. 2007-nji ýylda ol professional klub bolan “Gawra” geçip, şol ýerde iki ýyl oýnady. Soňra “Mançester Ýunaýtediň” futbolçysy boldy. “Ýunaýtediň” esasy düzüminde 7 oýna gatnaşdy.
2012-nji ýylda Pogba erkin agent hökmünde Italiýanyň “Ýuwentus” klubuna geçdi. “Ýuwentusyň” düzüminde ol dört gezek A Seriýasynyň çempiony, iki gezek Italiýanyň Kubogynyň ýeňijisi, üç gezek hem Superkubogyň eýesi boldy. 2015-nji ýylda UEFA-nyň Çempionlar ligasynyň finalyna çykmagy başardy.
2016-njy ýylda Pogba “Mançester Ýunaýtede” gaýdyp geldi. Transferiň bahasy 105 million ýewro bolup, şol wagt bu ony dünýäniň iň gymmat futbolçysyna öwürdi. “Ýunaýtediň” düzüminde ol Angliýanyň Ligasy Kubogyny we UEFA-nyň Ýewropa ligasyny gazandy.
Fransiýanyň milli ýygyndysynda Pogba 2018-nji ýylyň dünýä çempiony, UEFA-nyň Milletler ligasynyň ýeňijisi we Ýewropanyň wise-çempiony boldy.
2024-nji ýylyň fewralynda doping ulanandygy üçin futbolçy oýunlardan dört ýyllyk çetleşdirilmä sezewar edilipdi, ýöne oktýabrda Sport arbitraž kazyýeti (CAS) bu jezany 18 aýa çenli azaltdy. Pogbanyň diskwalifikasiýa döwri mart aýynda tamamlady.
