San-Paulu şäheriniň «Palmeýras» we Londonyň «Çelsi» toparlary Amerikanyň Birleşen Ştatlarynda geçirilýän 2025-nji ýylyň Klublaýyn dünýä çempionatynyň ilkinji çärýek finalçylary boldular.
1/8 final tapgyrynda «Palmeýras» Rio-de-Žaneýro şäheriniň «Botafogo» toparyny ýeňdi. Esasy wagtda hasap açylmady, oýun goşmaça wagta geçdi. 100-nji minutda «Palmeýrasyň» hüjümçisi Paulinýo ýeňiş topuny geçirdi — 1:0. Oýnuň ahyrynda «Palmeýras» azlykda galdy — goragçy Gustawo Gomes 118-nji minutda gyzyl duýduryş aldy.
Beýleki duşuşykda Londonyň «Çelsi» topary Portugaliýanyň «Benfikasyny» goşmaça wagtda 4:1 hasaby bilen ýeňdi.
Duşuşygyň tamamlanmagyna 5 minut galanda oýunçylar meýdany terk etmeli boldular — bu FIFA-nyň düzgünlerine laýyklykda, eger ýyldyrym 13 km radiusda urlasa, futbolçylar meýdançadan gitmeli, tomaşaçylar stadiondan çykarylýar. Duşuşygyň emininiň — Slawko Winçiçiň karary bilen oýun 2 sagat saklandy.
Oýun saklanmazdan öň «Çelsi» 64-nji minutda Ris Jeýmsiň geçiren goly bilen öňe çykypdy. Duşuşyk täzeden başlanandan soň, 92-nji minutda «Benfikanyň» oýunçysy Janluka Prestianni gyzyl duýduryş aldy. Şonda-da portugaliýalylar 90+5-nji minutda Anhel Di Mariýanyň geçiren penalti urgusy bilen hasaby deňläp, oýny goşmaça wagta geçirdiler.
Emma goşmaça wagtda «Çelsi» garşydaşyna hiç hili mümkinçilik goýmady: 108-nji minutda Kristofer Nkunku, 115-nji minutda Pedru Netu, 117-nji minutda bolsa Kirman Dýusberi-Holl tapawutlandy.
Çärýek finalda «Çelsi» bilen «Palmeýras» duşuşar. Bu oýun 5-nji iýulda sagat 6:00-da (Aşgabat wagty bilen) geçiriler.
