«Ähli zady üýtgeden adam» («Человек, который изменил все») we «Stiw Jobs» «(Стив Джобс») filmleriniň ssenaristi Aaron Sorkin «Sosial ulgam» («Социальная сеть») filminiň dowamyny döretmek bilen meşgullanýar. Deadline neşiriniň maglumatyna görä, ol täze filmiň diňe bir ssenarisiniň ýazary bolman, eýsem režissýory hem bolar.
Täze taslama gönüden-göni dowam bolman, 2010-njy ýylda çykan ilkinji filme goşmaça hökmünde görkezilýär. Esasy üns merkezinde Facebook-yň döreýşi we dünýä derejesindäki media platformasyna öwrülişi durýar.
Prodýuserler hökmünde Aaron Sorkin, Todd Black («Alamat»), Piter Rais («28 ýyl soň») we Stýuart Besser («Uly oýun») çykyş ederler.
Ssenariniň esasynda The Wall Street Journal neşirinde 2021-nji ýylda çap edilen The Facebook Files atly žurnalistik makalalar toplumy durýar. Ol makalalaryň awtory Jeff Horowitz kompaniýanyň içki iş proseslerini we jemgyýete ýetirýän zyýanlaryny açyp görkezýär.
«Sosial ulgam» 2010-njy ýylda çykdy. Filmiň režissýory Dewid Finçer bolup, ssenarisini Sorkin ýazdy. Ol film Ben Mezriçiň «Milliarder bolmaga mejbur bolanlar» atly kitaby esasynda döredildi. Film dünýä boýunça $226 million girdeji gazanyp, «Oskar» baýragynyň 8 nominasiýasynyň 3-sini ýeňip aldy.
Sorkin ozal hem Facebook-yň taryhyna dolanmak islegini bildiripdi, ýöne laýyk material tapmandy. 2020-nji ýylyň ýanwarynda bolup geçen Kapitoliý wakalaryndan soň, ol sosial ulgamyň syýasatda oýnaýan roluny öwrenmek isleýändigini aýtdy. Indi bolsa Sorkin bu taslamada Facebook-yň ýetginjeklere edýän täsiri we zorlugyň derejesi bilen baglanyşygyny hem açyp görkezmegi maksat edinýär.
