Nissan kompaniýasy meşhur Patrol awtoulagynyň iň güýçli görnüşini — 2025-nji ýylyň Nismo modifikasiýasyny tanyşdyrdy. Täze model Dubaýda geçirilen ýörite çärede görkezildi, bu ýerde şeýle awtoulaglara isleg aýratyn ýokary.
Kompaniýanyň resmi saýtynyň habar bermegine görä, awtoulag öňküsi ýaly 3,5 litrlik, iki turbinaly V6 motor bilen enjamlaşdyryldy, emma onuň güýji 425 at güýjünden 495 at güýjüne çenli ýokarlandyryldy. Bu bolsa ony taryhda iň güýçli Patrol edýär. Şeýle-de bolsa, iň ýokary aýlanma pursaty ozalkysy ýaly galdy — 700 N·m. Şeýle hem ulaga täze, has batly ses edýän tüsse çykar ulgamy ornaşdyryldy.
Täze modelde 9 basgançakly awtomat görnüşli täzeleşdirilen geçiriş gutusy, sazlanan dolandyryş ulgamy we pnewmatik asma (podweskasy) peýda boldy. Mundan başga-da, täze uýgunlaşdyrylan amortizatorlar gurlupdyr.
Ulagyň daşky görnüşi hem täzelenipdir: täze radiator gözenegi, güýçli bamperler, giňeldilen teker arkalary, 22 dýuýmlyk RAYS öndürijisinden bolan guýma tekerler we üçek spoýleri bilen tapawutlanýar. Kuzowda gyzyl reňkde bezeg elementleri peýda bolupdyr. Ýol görkezijiligi 195 mm çenli peseldilipdir.
Salon gyzyl-gara reňklerde bezelen bolup, deri we alkantara bilen örtülendir. Öň oturgyçlar sport görnüşlidir.
Täze modeliň bahasy entek aýan edilmedi, emma kompaniýanyň berýän maglumatyna görä, ol $100 müňden ýokary bolar. Satuw iýul aýynda başlanar. Bu model diňe Ýakyn Gündogar ýurtlarynda satuwa çykarylar, beýleki sebitlerde hödürlenmez.
