Ýaponiýaly geýmdizaýner we režissýor Hideo Kodzima iň meşhur oýun režissýory hökmünde Ginnesiň rekordlar kitabyna girizildi. Bu barada ýapon teleýaýlymlarynyň birinde berlen tok-şouwyň göni ýaýlymynda habar berildi.
Sosial ulgamlarda Kodzimanyň profili wideo oýunlary döredijileriň arasynda iň meşhury boldy. Rekord geçen ýylyň 8-nji noýabrynda hasaba alyndy: ony sosial ulgamlarda yzarlaýjylaryň sany 9,3 milliondan geçdi. Ýedi aýdan soň bu görkeziji Ginnesiň rekordlar kitabynyň hünärmenleri tarapyndan resmi taýdan ykrar edildi.
Geýmdizaýnere bolan gyzyklanmanyň artmagy 26-njy iýuna meýilleşdirilen Death Stranding 2: On the Beach oýnunyň relizine taýýarlyk bilen gabat geldi. Tok-şouwyň ýaýlymynda Kodzimanyň X sosial ulgamyndaky ýapon akkaunty hem görkezildi, onda geljekki oýnuň banneri ýerleşdirilipdir.
Kodzima Ýaponiýanyň çäginden çykan Metal Gear Solid oýunlarynyň awtory hökmünde dünýä meşhurlygyny gazandy. 1997-nji ýylda E3 sergisinde birinji bölümiň tanyşdyrylyşyndan soň, oýun iň köp garaşylýanlaryň biri bolup, 1998-nji ýylda çartlarda birinji orny eýeledi. Tankytçylar onuň kinematografiýa derejesiniň ýokarydygyny we filosofiki temalara degýän çylşyrymly sýužetini belledi. Kodzimanyň taslamalaryna, köplenç, wideo oýunlarynyň sungat bolup biljekdigine subutnama hökmünde seredilýär.
Häzir Kojima Productions studiýasy iki taslamanyň üstünde işleýär, ýöne olar barada entek maglumat ýok. Goşmaça maglumatlaryň 2026-njy ýylda peýda bolmagyna garaşylýar.
