Skydweller Aero amerikan başlangyjy we Thales fransuz kompaniýasy dolulygyna Gün energiýasy bilen işleýän drony döretdiler. Täze dron atmosfera hiç hili zyýanly madda goýbermän, gonmazdan 30 güne çenli howada galyp biler.
Enjam deňiz giňişliklerine gözegçilik etmek, daşky gurşawy goramak we bikanun awçylyk ýaly bikanun hereketlere gözegçilik etmek üçin niýetlenendir. Onuň ganatlarynyň uzynlygy Boeing 747-niňkiden uludyr, aňrybaş göterip bilýän ýüki 400 kg-a ýetýär.
Enjam MAPS adyny aldy. Onuň gurluşy ýeňil kompozit materiallardan ýasalan. Ganatlar elektrik hereketlendirijilerini we batareýalary işledýän Gün panelleri bilen örtülendir. Bu toplanan energiýanyň hasabyna enjamyň gije hem işlemegine mümkinçilik berýär.
Dolandyryş ulgamy ugry gönükdirmek, ýagdaýy seljermek we energiýanyň paýlanyşyny optimallaşdyrmak üçin emeli aň ulanýar. Içinde radarly modullar, datçikler we aragatnaşyk enjamlary ýerleşdirilen.
Skydweller ýangyçsyz uçuşyň mümkinçiliklerini görkezmegi maksat edinýän Solar Impulse taslamasyna esaslanýar. Dron balykçylyk meýdançalaryna gözegçilik etmek, garakçylaryň işjeňligini yzarlamak, daşky gurşawa gözegçilik we serhetýaka suwlarynda gözlegi alyp barmak üçin ulanylyp bilner.
Global geosyýasy kynçylyklaryň fonunda şeýle platformalar ekipažlar üçin töwekgelçiliksiz we az çykdajy bilen üznüksiz maglumat ýygnamaga mümkinçilik berýär.
