Massaçusets Tehnologiýa institutynyň Linkoln barlaghanasynyň barlagçylary aýna zatlary öndürmäge ukyply ilkinji 3D printeri çykardylar. Şu wagta çenli additiw önümçilik şokolad we plastmassa ýaly dürli materiallary öz içine alypdy, ýöne organiki däl aýna bu tehnologiýanyň çäginden daşarda galyp gelýärdi.
Aýnany gaýtadan işlemegiň nusgawy usuly 700-1800° C aralygyndaky temperaturany talap edýär, bu bolsa ony 3D çap etmekde ulanylmagy kynlaşdyrýar. Massaçusets ştatynyň alymlary bu meseläni pes temperaturaly 3D çap etmegiň usulyny işläp düzmek arkaly çözdüler.
Olar nanobölejiklerden we silikat ergininden durýan aýna sapak ýasadylar. Bu material çydamly, çeýe we çylşyrymly gurluşlary çap etmek üçin amatly. Bu proses "pes temperaturaly additiw önümçilik" diýen ady aldy.
Çap edilenden soň, önüm bişirmek üçin 250° C ýagly hammamda ýerleşdirilýär. Amal organiki erginiň kömegi arkaly materialyň artykmaç ýerlerini aýyrmak bilen tamamlanýar.
Işläp düzüjileriň sözlerine görä, täze tehnologiýa adaty usullar arkaly edip bolmaýan zatlary döretmäge mümkinçilik berýär. Ol ýokary temperatura niýetlenip döredilen elektron komponentleri öndürmekde we mikroflýuid ulgamlaryny ösdürmekde islegli bolup biler.
