Iň abraýly halkara uniwersitetleriň sanawlarynyň biri bolan QS World University Rankings -iň täzelenen neşiri çap edildi. Öňki ýyllarda bolşy ýaly, sanawda öňdebaryjy orunlary ABŞ-nyň we Beýik Britaniýanyň uniwersitetleri eýeledi.
Birinji ýeri ABŞ-nyň Kembrij şäherinde ýerleşýän Massaçusets tehnologiýa instituty (MIT) eýeledi. Ol dünýädäki iň köne we iň täsirli tehniki uniwersitetleriň biridir.
MIT 1861-nji ýylda ýurduň senagatynyň gülläp ösýän döwründe döredildi. Uniwersitetde dünýäniň 115 ýurtdan, takmynan, 12 000 talyp okaýar. Institut barlaglar üçin her ýyl takmynan 1 milliard dollar sarp edýär.
QS boýunça dünýäniň iň gowy 10 uniwersiteti:
- Massaçusetsiň tehnologiýa instituty (ABŞ)
- Londonyň Imperiýa kolleji (Angliýa)
- Stenford uniwersiteti (ABŞ)
- Oksford uniwersiteti (Angliýa)
- Garward uniwersiteti (ABŞ)
- Kembrij uniwersiteti (Beýik Britaniýa)
- Sýurihiň Şweýsariýa Federal tehnologiýa instituty (Şweýsariýa)
- Singapuryň Milli uniwersiteti (Singapur)
- Londonyň uniwersitet kolleji (Beýik Britaniýa)
- Kaliforniýanyň tehnologiýa instituty (ABŞ)
QS sanawyny her ýyl britan kompaniýasy bolan Quacquarelli Symonds düzýär. Ol THE (Times Higher Education) we ARWU (Şanhaý) sanawlary bilen bir hatarda dünýäde iň abraýly üçleriň biri hasaplanýar.
Bu sanawlar dünýäniň ýokary okuw mekdeplerinde bilimiň hiline we barlaglaryň derejesine baha bermekde dalaşgärler, ylmy guramalar, iş berijiler we döwlet edaralary tarapyndan giňden ulanylýar.
