11-nji iýunda NASA-nyň Aýyň orbitasyndaky Lunar Reconnaissance Orbiter (LRO) atly enjamy Sowuk deňiz (Mare Frigoris) sebitini surata düşürdi. Bu ýere 5-nji iýunda ispace Mission 2 SMBC x HAKUTO-R Venture Moon atly («Resilience») Aý moduly baryp urlupdy.
Suratlar, takmynan, 80 km beýiklikden dar burçly kamera bilen düşürilen. Olarda modulyň baryp urlan ýeriniň töwereginde ýagty galonyň dörändigini görmek bolýar, ol uly bolmadyk burç bilen zyňylan Aý regolitiniň (topragynyň) bölejikleriniň yzlarydyr. Bu yzlar zarbanyň häsiýeti barada maglumat berýär.
Resilience moduly 2025-nji ýylyň 15-nji ýanwarynda Aýa ýük eltmek maksady bilen geçirilen hususy missiýanyň çäginde uçurylypdy.
Alnan suratlaryň öwrenilmegi hünärmenlere çaknyşygyň aýratynlyklaryny we şol sebitiň ýerüsti gurluşyny takyklaşdyrmaga mümkinçilik berer. Bu ýer uly jaýryklary bolan wulkanik sebit bolup durýar.
Fotosuratlar giňişleýin öwrenilip, geljekki missiýalara taýýarlyk görmekde we gonuş tehnologiýalaryny kämilleşdirmekde peýdalanylar.
LRO enjamy 2009-njy ýyldan bäri Aýyň orbitasynda hereket edýär. Onuň missiýasy Goddard kosmiki uçuş merkezinden dolandyrylýar. Enjamda ýerleşýän ýedi sany ylmy enjam NASA-nyň Aý maksatnamasy üçin möhüm maglumatlary ýygnamaga hyzmat edýär, bu bolsa Aýa adam ibermek baradaky meýilnamalary we hususy hem-de halkara hyzmatdaşlyklary öz içine alýar.
