Meşhur Labubu oýnawaçlaryny çykarýan Pop Mart kompaniýasynyň eýesi “Ženmin žibao” gazetindäki ýiti tankytdan soň tas 4 mlrd dollar ýitirdi. Kompaniýanyň paýnamalary Gonkong biržasynda birden arzanlady diýip, South China Morning Post habar berýär.
Hytaýyň Kommunistik partiýasynyň MK-nyň resmi çap neşiri bolan gazet kompaniýanyň iş modelini “bilkastlaýyn konsýumerizmde” aýyplady. Gürrüň alyja gutyny açýança içinde nähili oýnawajyň bardygyny bilmäge mümkinçilik bermeýän sýurpriz-gutular barada gidýär. Neşiriň pikiriçe, şeýle ulgam çagalarda we ýetginjeklerde garaşlylyk döredip, doly kolleksiýany ýygnamak üçin gaýtadan satyn almaga itergi berýär.
Şol bir wagtyň özünde, Pop Mart makalada gönüden-göni agzalmaýar. Tekstde “bu gyzyklanmadan esasy peýdalanyjy” barada aýdylýar we bu analitikleriň pikiriçe, hut bu kompaniýany görkezýär. Pop Mart-yň iň meşhur seriýasy Aziýada, Ýewropada, Russiýada we ABŞ-da belli bolan dişli elfler Labubu bolup galýar.
Pop Mart-yň paýnamalarynyň bahasy iki günde 8,8% azaldy, bazar bahasy bolsa 30,89 mlrd Gonkong dollary (takmynan, $3,93 mlrd) pese gaçdy. Anna güni paýnamalar ýene 3,6% azalyp, 239,60 Gonkong dollary derejesinde ýapyldy.
2023-nji ýylda Hytaý häkimiýetleri sekiz ýaşa çenli çagalar üçin sýurpriz-gutularyň satuwyny çäklendirdi. Şol wagt bu çäre syýasy toparlaryň arasynda goldanyldy.
Tankyda garamazdan, analitikler oňyn çaklamany saklaýar. UBS ýyllyk hasabynda girdejiniň 35% ösmegine garaşýar, JPMorgan bolsa Labubu-nyň meşhurlygyny Hello Kitty bilen deňeşdirýär. 2025-nji ýylyň birinji çärýeginde Pop Mart-yň daşary ýurtlarda satuwy 480% ýokarlandy, kompaniýanyň bahasy bolsa beýleki uly oýnawaç öndürijileriniň – Sanrio (Hello Kitty), Hasbro (My Little Pony, “Transformerler” we “Monopoliýa”) we Mattel (Barbi gurjaklary – umumylykdaky bahasyndan geçdi.
