Antarktikadaky Ueddell düwlenleriniň populýasiýasy 1977-nji ýyldan bäri 54% azaldy. Bu barada Global Change Biology žurnalyndaky gözlege salgylanyp, The Guardian habar berýär.
Gözegçilik 1970-nji ýyllardan bäri subantarktika sebitinde, aýratynam, Signýu adasynda deňiz süýdemdirijileriniň sanyny öwrenýän Britaniýanyň antarktika gullugynyň (BAS) hünärmenleri tarapyndan geçirildi. Üç görnüş üns merkezine alyndy: Ueddell düwlenleri, Antarktikanyň deňiz pişikleri we günorta deňiz pilleri.
Alymlar 1982-nji ýyldan bäri deňiz buzuna hemra gözegçiliginiň maglumatlaryny 1977-nji ýyldan bäri alnyp barylýan haýwanlaryň sanynyň hasaplamalary bilen deňeşdirdi. Bäş onýyllygy, şol sanda ýylama we wagtlaýyn sowama döwürlerini (1998-2014-nji ýyllar) öz içine alýan bu maglumatlaryň esasynda gözlegçiler buz şertleriniň üýtgemeginiň düwlenleriň populýasiýasyna eden täsirine baha berdi.
Netijede, Ueddell düwlenleriniň sanynyň 54%, deňiz pişikleriniň – 47% azalandygyny anyklamak başartdy. Günorta deňiz pilleriniň populýasiýasy uly azalmany görkezmedi.
