Meşhur “Astral” (Астрал) we “Freddi bilen bäş gije” (Пять ночей с Фредди) horror filmlerini döreden Blumhouse kompaniýasy “Byçgy” (Пила) franşizasynyň ähli geljekki filmleri, şüweleňleri we beýleki taslamalary üçin hukuklary satyn aldy. Bu barada Variety neşiri habar berýär.
Ozal hukuklar Oren Kules bilen Mark Burga degişlidi, olar bilen şertnamanyň bahasy aýan edilmeýär. Kules öz beýanynda “estafetany geçirmegiň wagtynyň gelendigini” aýtdy, Burg bolsa “öňe hereket edip, täze wakalary gürrüň bermek” isleýändigini belledi.
Franşizanyň on filminiň ählisini çykaran we olaryň üsti bilen dünýä prokatynda bir milliard dollardan gowrak gazanan Lionsgate studiýasy 50% paýy saklap galar we täze filmleriň önümçiligine hem prokatyna kömek etmegini dowam etdirer.
Variety neşiriniň maglumatlaryna görä, ilkinji “Byçgy” filminiň režissýory Jeýms Wan täze bölümleriň önümçiligine gaýdyp geler. 2024-nji ýylda onuň Atomic Monster kompaniýasy Blumhouse bilen birleşdi.
Blumhouse-yň ýolbaşçysy Jeýson Blum “Byçgyny” “elhençlik žanrynyň tutuş neslini kesgitlän film” diýip atlandyrdy. Onuň aýtmagyna görä, franşizanyň medeni ähmiýeti artmagyny dowam etdirýär, şonuň üçin oňa maýa goýmagy strategiki ädim hasaplaýar.
