Garyşyk söweş sungatynyň türkmenistanly wekili Abdulla Babaýew halkara ýaryşlarynda üstünlikli çykyşlaryny dowam edýär. Bu gezek ol Ulýanowskide (Russiýa) geçirilen Fight Nights ýaryşynda russiýaly garşydaşy Habib Guseýnowdan üstün çykdy. Abdulla birinji raundda demikdiriji usuly ulanyp, Fight Nights ýaryşlarynda yzygider dördünji ýeňşini gazandy.
24 ýaşly türkmen türgeni bu promouşende geçiren 4 tutluşygynyň hemmesinde hem ýeňiş gazanyp, üstünlikli statistikasy bilen tapawutlanýar. Tutluşyklarynyň ählisini hem ol demikdiriji usul ulanyp, möhletinden öň tamamlady.
A.Babaýew bu söweşe taýýarlygy Mahaçkaladaky Abdulmanap Nurmagomedow adyndaky sport zalynda geçdi.
Ýaryşy göni ýaýlymda UDAR teleýaýlymy görkezdi.
