Apple 2027-nji ýyla çenli Apple Watch sagatlaryna ganyň düzümindäki glýukozanyň derejesini ölçemek funksiýasyny goşmagy meýilleşdirýär. Bu barada GF Securities analitigi Jeff Pu salgylanyp, Appleinsider neşiri habar berýär.
Bellenilişi ýaly, glýukometr 2027-nji ýylyň güýzünde çykmaly Apple Watch Series sagatlarynyň esasy funksiýasy bolar. Gurluş Apple-iň gandaky şekeriň derejesini ölçäp biljek ilkinji gajeti bolar. Bu glýukoza görkezijilerine yzygiderli gözegçilik etmeli süýji keselli ulanyjylar üçin aýratyn möhümdir.
Analitik goşmaça maglumat bermedi, ýöne Appleinsider kompaniýanyň derini deşmezden glýukozany barlamaga mümkinçilik berýän tehnologiýanyň üstünde köpden bäri işleýändigini ýatladýar. 2024-nji ýylyň güýzünde Bloomberg Apple-iň şeýle gurluşy döretmäge ýakyndygyny habar berdi.
Žurnalistler hem Apple Watch-da saglyk bilen bagly soňky uly funksiýanyň 2020-nji ýylda hödürlenen pulsoksimetr bolandygyny belläp geçýär. Ol ganyň kislorod bilen baýlaşma derejesini ölçemäge mümkinçilik berýär. Ýöne ABŞ-da satylýan täze modellerde bu funksiýa Apple bilen Masimo kompaniýasynyň arasyndaky patent dawasy sebäpli elýeterli däl.
