Hytaýyň elektrik skuterleri bilen tanalýan Kuickwheel tehnologiýa kompaniýasy bu gezek düýbünden täze ulagy – uçýan Skyrider X6 trisikl-amfibiýalaryny hödürledi. Täze önümiň görkezme uçuşy Pekinde geçirildi.
Uçmak üçin trisikl alty sany wint bilen enjamlaşdyryldy, olaryň hersi aýratyn egnine oturdyldy. Fýuzelýažy ugleplastikden we uçaryňky ýaly alýumin garyndysyndan ýasalýar. Sygymy 10,5 kilowat sagatlyk bolan batareýasy, takmynan, 20 minut uçuşy üpjün edýär. Howada hereketiniň iň ýokary tizligi sagatda 72 km-ä ýetýär. Batareýa hemişelik tokdan çalt zarýad alýar - energiýasyny doldurmak bir sagada golaý wagt alýar.
Skyrider X6 awtomatiki usulda uçup, öňünden kesgitlenen ugur boýunça hereket edip we gonup bilýär. Tejribeli uçarmanlar üçin el bilen dolandyryş tertibi hem göz öňünde tutulan. Howpsuzlygy üpjün etmek üçin, köp enjam ulgamlary dublirlenýär. Mundan başga-da, heläkçilik paraşýuty bilen enjamlaşdyrylandyr.
Ýer režiminde Skyrider X6 yzky tigirleri hereketli trisikle öwrülýär. Bu tertipde ulagyň tizligi sagatda 70 km-ä ýetýär we takmynan 200 kilometri geçip bilýär.
Skyrider X6 üçin öňünden sargytlar Hytaýyň marketpleýsleriniň birinde eýýäm kabul edilip başlandy. Onuň bahasy 498 800 ýuana (takmynan 69,5 müň dollar) deňdir.
