Nissan-yň baş direktory Iwan Espinoza kompaniýanyň Renault fransuz awtoöndürijisindäki paýyny azaltmagy meýilleşdirýändigini aýtdy.
Mart aýynda Nissan we Renault biri-birinde eýeçilik edýän paýlarynyň talap edilýän iň az möçberini 15%-den 10%-e çenli azaltmak barada ylalaşdy. Şertnama görä, paýnamalaryň islendik satuwy hyzmatdaş bilen ylalaşylmaly we üçünji tarapa satylmazdan ozal, hyzmatdaşa teklip edilmeli. Hyzmatdaş bu paýnamalary özi satyn alyp bilýär ýa-da resmi taýdan ýüz öwrüp bilýär.
Nissan Renault-yň paýnamalarynyň 5%-ini satmagy meýilleşdirýär, bu häzirki paý bahalary boýunça, takmynan, 100 mln ýena (takmynan, 640 mln dollar) almaga mümkinçilik berer. Bu serişdeler çylşyrymly ykdysady ýagdaýlarda täze awtomobilleri işläp taýýarlamaga gönükdiriler. LSEG-iň maglumatlaryna görä, häzir Nissan Renault-yň paýnamalarynyň 15%-ine eýeçilik edýär.
Nissan-yň meýilnamalary baradaky habar Renault ýolbaşçysy Luka de Meonyň kompaniýadan gidýändigini habar berenden tiz wagtdan soň peýda boldy. Bu onuň awtomobil pudagyndan daşary işler bilen meşgullanmak islegi bilen baglanyşykly boldy.
“Biz ulag serişdelerine maýa goýmak üçin biri-birimizde paýnamalara eýeçiligimizi azaldýarys” – diýip, Nissan-yň baş direktory Iwan Espinoza belledi.
