Renault Trucks we Kleuster şäher logistikasy üçin niýetlenen Kleuster 350 kysymly elektrik ýük welosipedini hödürlediler. Bu modeliň önümçiligi Fransiýanyň Wenisýo şäherindäki Renault Trucks zawodynda ýola goýuldy.
Öndürijileriň bellemegine görä, elektron söwdanyň ösmegi, eltip beriş wagtynyň gysgaldylmagy we ekologiýa bilen bagly talaplaryň güýçlenmegi şäher logistikasynda kynçylyklary döredýär. Kleuster 350 «soňky mildäki» eltip bermeler üçin çözgüt hökmünde işlenip düzüldi.
Model Renault Trucks-yň inženerleri tarapyndan Kleuster-iň ýük welosipedleri babatyndaky 10 ýyllyk tejribesine esaslanyp taýýarlandy. Welosiped zynjyrsyz transmissiýa, 35 km çenli ýol geçmäge ukyply dakylyp-aýrylýan akkumulýatorlar, rahatlyk üçin öňdäki we yzdaky podweska bilen enjamlaşdyrylyp, bary-ýogy 2,4 metrlik ykjam öwrüm radiusy bar.
Kleuster 350 Fransiýadaky garaşsyz Transpolis merkezinde geçirilýän çydamlylyk synaglarynda öz ygtybarlylygyny subut etdi. Synaglara 30 müň kilometrden gowrak ýol we 1440 sagatlyk hereket degişlidir.
Müşderilere iki wersiýa hödürlener:
- Box 350 — ýapyk kuzowly, kurýer we azyk sargytlaryny eltmek üçin niýetlenen (ýük göterijiligi 150-300 kg),
- Pick-up 350 — açyk platformaly, enjamlar üçin, ýaşyl zolaklara ideg, tehniki işler, şäher ýerlerini arassalamak we kärhanalaryň içinde logistiki işler üçin niýetlenen.
Täze modelleriň çykmagy bilen Kleuster hatary ýedi konfigurasiýa çenli giňeldildi. Welosipedleriň hemmesi Fransiýada taslanyp, Renault Trucks diler tory arkaly satuwa çykarylýar.
